Prinses Sjuulke I
Hallo allemaol,
Ich bön Sjuulke Dings, gebaore op 24 miërt 2004 op un prinselikke sjtraot, namelik de Prins Hendriksjtraot. Inmiddels bön ich same met miene pap, mam en mien aaijere zus Neeltje naor de Sjoëlsjtraot verhoës.
Ich bön dus ein ech Belvends maedje maar gaon iddere daag naor sjoël beej ut Valuascollege, naor 2 Atheneum. Ich gaon gaer naor sjoël maar miene leukste tiëd iddere daag is de pauze en zien de gymlesse.
As ich vreej bun sjpeul ich dwarsfluit beej de Hermenie in Belvend, det doon ich al biënao veer jaor. En turne is ouch iets wat ich hiël gaer doon, namelik beej Sparta Venlo, in de Hamar. Vruuger waas det Vlug en Lenig.
Zoë as de meiste minse weite is miene pap aafgeloupe jaor Belhamelprins gewaes. Vastelaovend viere zit beej ôs in de femielie. Ich had der den ouch erg vuul zin in um meij te doon beej de jeugdcarnaval en heb mich same met mien vriendinne opgegaeve. Pap haopte det ich de gelökkige zou waere en wat un gelök, det mien lötje is getrokke en det ich Prinses bön gewaore. Ich waas super bliej toen mien pap en mam mich vertelde; “dow bös dit jaor jeugprinses”, det had ich gaar neet verwach!!
Pap zei van te veure taege ôzze hongk dae Tess hét; “‘Tess Tess, Sjuulke wuurt prinses!’. Nao dae daag haet pap det neet mier gezag en woort d’r beej ôs gesjwege.
Maar wat geej môt weite is det ich d’r super vuul zin in heb! Netuurlik heb ich al ein bietje meuge preuve met pap veurig jaor.
Ut leefste had ich ut uch allemaol allang iërder verteld, maar ich ken sjwiege………………..
Ich verheug mich d’r op um same met uch allemaol vastelaovend 2018 te gaon viere ônger ut motto: ‘ laef en belaef ut’.
Geej belaef ut toch ouch meij……….??
Prinses Sjuulke I
